काठमाडौं । दार्चुलास्थित महाकाली नदी तर्ने क्रममा भारतीय एसएसबीले तुइनको तार काटिदिँदा जयसिंह धामी सोही नदीमा बेपत्ता भएको सोमबार (आज) एक महिना पूरा भएको छ । तर यो घटनाबारे सरकारले गठन गरेको छानबिन टोलीले कुनै प्रतिवेदन सार्वजनिक गर्न सकेको छैन । घटनामा भारतीय एसएसबीको संलग्नता भएको स्पष्ट हुँदाहुँदै पनि यो प्रकरणमा सरकारको दृष्टिकोण अस्पष्ट भएको भन्दै सत्ता गठबन्धनका नेताहरूले प्रधानमन्त्रीसमक्ष असन्तुष्टि जनाएका छन् ।

सोमबार प्रधानमन्त्रीको सरकारी निवास बालुवाटारमा बसेको सत्ता गठबन्धनको बैठकमा नेताहरुले धामी वेपत्ता प्रकरण छानविनका लागि गठित छानविन प्रतिवेदन सार्वजनिक गर्न भएको ढिलाइ र आगामी दिनमा त्यस्ता घटना दोहोरिन नदिन छिमेकी मुलुक भारतसँग कुरा गर्नुपर्ने बताएका थिए । सत्ता गठबन्धनका नेताहरुले धामी प्रकरणबारे प्रश्न उठाउँदा प्रधानमन्त्री देउवा भने बैठकमा मौन रहेको बैठकमा सहभागी एक नेताले बताए ।

गठबन्धनका नेताहरूले धामी बेपत्ता प्रकरणमा सरकारको अडान प्रष्ट पार्न प्रधानमन्त्री देउवाको ध्यानाकर्षण गराएका छन् । ‘हामीले जयसिंह धामी प्रकरणबारे भइरहेको ढिलाई र आगामी दिनमा सरकारले चाल्नुपर्ने कदमका बारेमा प्रश्न गर्यौ तर प्रधानमन्त्री देउवाले ठोस जवाफ दिनुभएन’, नेकपा एकीकृत समाजवादीका नेता डा. बेदुराम भुसालले भने, ‘ ‘छानविन प्रतिवेदन बनेपछि सबै कुरा आउँछ भन्ने कुरा गर्नुभयो ।’

१५ साउनमा महाकाली नदी तर्ने क्रममा भारतीय एसएबीले तुइनको तार काट्दा धामी नदीमा खसेको प्रत्यक्षदर्शी र स्थानीबासीले बताइसक्दा पनि सरकारले यसबारे कुनै ठोस कदम चाल्न सकेको छैन ।सरकारले १७ साउनमा १० दिनको म्याद राखेर उक्त घटना छानबिन समिति बनाएको थियो, जसको हालसम्म तीन पटकसम्म म्याद थपिएको छ । तर समितिले प्रतिवेदन तयार पार्न सकेको छैन । यो घटनामा सरकारले भारतसँग कूटनीतिक रूपमा छलफल नगरेको भन्दै चौतर्फी आलोचना हुँदै आएको छ ।