गण्डकी । शहरीकरणको विस्तारसँगै मुलुकका अधिकांश स्थानमा कृषिप्रति आकर्षण घटिरहेको बेला गण्डकी प्रदेश भने दूधमा आत्मनिर्भर बन्ने अवस्थामा पुगेको छ ।

पछिल्लो वर्षमा व्यावसायिक गाई तथा भैँसीपालन क्रमशः बढ्दै गएपछि प्रदेशमा प्रतिदिन ६५ हजार लिटर दूध उत्पादन हुने गरेको छ । माग अनुसार दूध आत्मनिर्भरताको अवस्थामा पुगेको नेपाल डेरी एसोसिएशन गण्डकी प्रदेशका अध्यक्ष शिवहरि आचार्यले जानकारी दिए ।

‘यहाँको मागको ९० प्रतिशत दूध गण्डकीमा उत्पादन हुने गरेको छ’, उनले भने, ‘पछिल्लो वर्षमा गाईपालनतर्फ सर्वसाधारण आकर्षित बन्दै गएका कारण हामी आत्मनिर्भर बन्दै गएका हौं ।’

आचार्यका अनुसार गण्डकी प्रदेशमा स्थानीय उत्पादनका अतिरिक्त चितवन, नवलपरासी, कपिलवस्तु र रूपन्देहीबाट दूध आउने गरेको छ । गण्डकीको नवलपुरबाट अन्य प्रदेशमा दूध निर्यात हुने गरेको छ ।

प्रदेशको राजधानी पोखरासहित विभिन्न जिल्ला सदरमुकाममा दूधको खपत बढी हुन्छ । आचार्यले गण्डकीभित्र ठूला ४, मझौला ८, साना २० र घरेलु १०० डेरी रहेको जानकारी दिए ।

दूधको सेवन गर्ने क्रम पछिल्लो वर्षमा बढ्दै गएकाले दिनानुदिन माग बढ्दो क्रममा रहेको व्यवसायी बताउँछन् । कोरोना कहरयता बढ्दो महँगी भने गम्भीर समस्याकारूपमा देखापरेको पोखरा महानगरपालिका-३३ भरतपोखरी बाघमाराका अगुवा किसान ठाकुर आचार्य बताए ।

२०६६ साल पछि व्यावसायिक गाईपालनमा लागेका आचार्यले अहिले दैनिक ५० लिटर दूध उत्पादन गर्दै आएका छन् । उत्पादित दूधको बजारमा समस्या नभए पनि बढ्दो महँगीका कारण उत्पादनको लागत बढ्न गएको उनको भनाइ छ ।

आचार्यका अनुसार कोरोना कहर अघिसम्म आठ/नौ सयमा पाइने चोक्कर अहिले २ हजार २०० पर्ने गरेको छ । यस्तै ४० हजारमा एक ट्रिप पराल आउने गरेकामा अहिले भने ९० हजारदेखि ९५ हजारसम्म पर्ने गरेको उनले बताए ।

‘बढ्दो महँगीसँगै गाईको दूधको लागत प्रति लिटर १ सय १० सम्म पर्ने गर्छ तर सरकारी निर्धारित मूल्य अनुसार किसानले ५७/५८ रूपैयाँ मात्रै पाउने गरेका छन्’, उनले भने, ‘किसानका यी समस्यामा सरकारको ध्यान पुगेको छैन ।’

व्यावसायिकताको विकाससँगै कास्कीको पोखरा महानगरपालिका-३३ भरतपोखरीको बाघमारा लगायतका स्थानले पछिल्ला समयमा राम्रो पहिचान बनाएका छन् । पछिल्लो वर्षमा व्यावसायिक रूपमा फस्टाउँदै गएको दुग्ध उत्पादनका साथै तरकारी खेतीसँगै बाघमारा दूधको सहरकारूपमा घोषित बनेको छ ।

दुई दशक अघि २०५० सालमा बाघमाराबाट दुग्ध विकास संस्थानलाई दूध संकलन गरी बिक्री गर्न थालेसँगै यस क्षेत्रमा कृषिको व्यवसायिकतामा विकास भएको हो । २०५७ साल पछि यस क्षेत्रमा गाई पालनप्रति आकर्षण बढ्दै गएको चिरगादी दुग्ध उत्पादक सहकारी संस्थाका पूर्वअध्यक्ष विश्वेश्वर हरामी बताए ।

सुरुमा दुग्ध विकास संस्थानले दूध लैजाने गरेको यस ठाउँमा २०६१ साल भदौदेखि नीजिस्तरबाट सञ्चालित पन्थी डेरीले बाघमारामा दूध संकलन गर्न थालेको थियो । अन्य निजी डेरी पनि बाघमारामा सम्पर्कमा आउन थालेसँगै गाईपालनको वातावरण थप बढेको उनले जानकारी दिए ।

सुरुमा २०५०/५१ सालतिर तालचोकसम्म दूध पुर्‍याउनु पर्नेमा यातायातको सुविधासँगै २०६१ सालपछि पुलचोक दूध संकलन केन्द्रकारूपमा विकास भएको थियो ।

पछिल्ला वर्षमा चिरगादीमा पक्की पुल बन्नुका साथै पोखराको दोभिल्ला हुँदै सवारीसाधन आवतजावत गर्न थालेका कारण उत्पादित दूध बजारमा पुर्‍याउन सहज भएको छ । बाघमाराबाट बजारमा दूधको बढ्दो मागका साथै पछिल्लो समयमा स्थानीय युवा पनि यसतर्फ आकर्षित बन्न थालेको उनले बताए ।