दाङ । तुलसीपुर उपमहानगरपालिका-१२ कचिलाका महिलामा शीतको कुनै प्रवाह नगरेर एक हातमा कुटो, अर्को हातले छुपु-छुपु प्याजका बेर्ना रोपिरहेका थिए ।

कोही प्याजका बेर्नामा पानी हालिरहेका थिए त कोही जमिन सम्ह्याइरहेका थिए । त्यहाँ २५ किसानको दैनिकी अहिले त्यसरी नै बितिरहेको छ । यी २५ महिला किसान मिलेर सामूहिक प्याज खेती गरेका छन् ।

रोपिसकेपछि पनि पालैपालो हेरचाह गर्दै आएका छन् । हरियाली कृषक आमा समूहमार्फत सामूहिक उत्पादनको अभ्यास गरिरहेका छन् ।

तुलसीपुरको कृषि उत्पादनका हिसाबले सबैभन्दा राम्रो क्षेत्र मानिएको कचिलामा प्याज पकेट क्षेत्र घोषणा गरेपछि त्यहाँ समूह बनाएर उत्पादनमा जोडिएको हो ।

कृषि ज्ञान केन्द्रले लगातार तीन वर्ष  त्यहाँ सामूहिक प्याज खेतीका लागि आर्थिक सहयोग गर्दै आएको छ । २०७७/७८ मा १० लाख सहयोग गरेको ज्ञान केन्द्रले २०७८/७९ मा दुई लाख र चालु वर्षम पाँच लाख सहयोग गरेको छ ।

त्यसले गर्दा पनि त्यहाँका महिलाले करिब १५ बिघा क्षेत्रफलमा सामूहिक खेती गर्ने गरेका छन् । गएको वर्ष मात्रै प्रत्येक महिलाको भागमा १५ क्विन्टल प्याज परेको स्थानीय विन्दु चौधरीले बताइन् ।

‘गएको वर्ष सिँचाइ अभाव भयो, ढिला गरी बेर्ना रोप्यौँ’, विन्दुले भनिन्, ‘त्यसले गर्दा उल्लेख्यरूपमा उत्पादन भएन, एउटाको भागमा १५ क्विन्टलमात्रै पर्‍यो ।’ यो वर्ष उत्पादन बढ्ने अपेक्षा रहेको उनको भनाइ छ ।

जग्गा भाडामा लिएर उनीहरूले यसरी व्यावसायिक प्याज खेती गरेका हुन् । आफैँ बीउ तयार गरेर रोप्ने गरेको किसान दशनी चौधरीले जानकारी दिइन् । उत्पादन राम्रो भए पनि बजारीकरणका लागि भने समस्या हुने गरेको उनको गुनासो छ ।

‘गएको वर्ष उत्पादन भएको प्याज हामीले बिक्री गर्न निकै समस्या भयो, छिटुवामा कहिल्यै यता डुलाउने, कहिल्यै उता डुलाउने भयो’, दशनीले भनिन्, ‘पछि नबिकेपछि त्यसै घर फर्काउनुपर्ने अवस्था भयो ।’

प्याज तीन महिनामा फलिसक्छ । प्याजलाई एक नम्बरको तीन सयमा बेच्ने गरेको दशनीले बताइन् । यसरी सामूहिक खेती गरेरै उनीहरूको घर चल्ने गरेको छ । छोराछोरीलाई पढाउनेदेखि दैनिक घर खर्च चलाउनेसम्मको काम गरेको स्थानीय मीनकुमारी चौधरीले जानकारी दिइन् ।

उनीहरूले ती जग्गामा प्याजमात्रै सामूहिक गर्ने गर्छन्, त्यसपछिका खेती भने सम्बन्धिन जग्गाधनीले मात्रै लगाउने गर्छन् । आफूहरूले प्याजको सिजनमा मात्रै जग्गा भाडामा लिएको उनीहरूको भनाइ छ ।

‘प्याजको सिजनमा हामीले जग्गा भाडामा लिन्छौँ’, उनले भनिन्, ‘त्यो भन्दा अन्य बालीमा सम्बन्धित जग्गाधनीले नै लगाउने गर्छन् ।’ कचिलाका खेतमा वर्षमा तीन सिजनमा तरकारी उत्पादन हुने गरेको वडाध्यक्ष खुसीराम चौधरीले बताए ।

प्याजको सिजनपछि त्यहाँ मकैखेती हुने गर्छ भने मकै उत्पादनपछि आलुखेती हुने गर्छ । प्याजमा पकेट क्षेत्र बनाएर कृषि ज्ञान केन्द्रले सहयोग गरेपछि सहज भएको अध्यक्ष चौधरीको भनाइ छ ।

उनका अनुसार ज्ञान केन्द्रले आर्थिकसँगै औषधी, मल, बीउमा पनि सहज हुँदै आएको छ । बजारीकरणमा देखिएको समस्या भने अत्यधिक छ ।

राति ३ बजे उठेर यहाँका महिला बजारमा उत्पादन सामग्री लिएर जान्छन् । तर भारतीय तरकारीका कारण यहाँ उत्पादन भएको तरकारी बिक्री नहुँदा फर्काएर ल्याउनुपर्ने अवस्था छ ।