काठमाडौं । आफूलाई ‘सामाजिक अभियन्ता’ दाबी गर्ने ज्वाला संग्रौला र उनको समूहले प्रहरीमाथि गरेको गालीगलौजको छानविन हुने भएको छ । महानगरीय प्रहरी वृत्त महाराजगञ्जका प्रहरी सहायक निरीक्षक (असई) मणिकान्त झाविरुद्ध दिएको आपत्तिजनक अभिव्यक्तिको छानबिन सुरु भएको छ ।
संग्रौलाले ‘मधेसका रहेछौं उतै गएर काम गर्नु, सजिलो पनि हुन्छ, म जसरी पनि सरुवा गरेरै देखाइदिन्छु,’ भन्दै (असई) झालाई धम्की दिएकी थिइन् ।उनको उक्त अभिव्यक्तिविरुद्ध मधेसी आयोगमा बुधबार उजुरी परेपछि घटनाको छानबिन सुरु भएको हो । आयोगले यस घटनाको बारेमा प्रहरी प्रधान कार्यालयलाई समेत सूचित गराइसकेको छ ।
नेपाल प्रहरीका प्रवक्ता तथा एसएसपी वसन्त कुँवरले आयोगबाट अनौपचारिक रुपमा सुचना आइसकेको र लिखित जानकारी आएपछि छानबिन सुरु गरिने बताए । बुधबार आयोगमा दर्ता भएको उजुरीको दर्ता नम्बर १८३ रहेको आयोगका कर्मचारी दीपेन्द्र यादवले बताए ।
निषेधाज्ञाका बेला संग्रौलासहित चढेकाे गाडी राेकेर सवारी पास जाँच गरेकाेमा उनीहरूले असई झामाथि गैर-सामाजिक व्यवहार गरेका थिए । राज्यले ताेकेकाे कर्तव्य इमानदारीपूर्वक गरेका झालाई उल्टै धम्क्याएकाे भिडियाे सार्वजनिक भएपछि संग्राैलासमूहकाे विराेध भइरहेकाे छ ।
यस्तो छ घटनाको वास्तविकता
निषेधाज्ञामा पास बिना सवारी चलाउन नमिल्ने भन्दै ड्युटिमा रहेका झाले संग्राैलाहरू चढेकाे गाडीकाे पास मागेका थिए । तर,उनीहरूले देखाउन इन्कार गरेका थिए । त्यसपछि प्रहरीले सवारी चालक अनुमति पत्र (लाइसेन्स) देखाउन अनुरोध गर्दा उनीहरुले लाइसेन्स पनि देखाउन सकेनन् ।
आवश्यक कागजात नभएपछि प्रहरीले गाडी होल्डमा राख्याे । त्यसपछि संग्राैलाकाे समूहले झासहित प्रहरीसँग विवाद गरेका थिए । नेपाल प्रहरीका प्रवक्ता कुँवरले आयोगबाट औपचारिक रूपमा पत्र आएपछि घटनामाथि छानबिन गरी दोषीलाई कारबाही गरिने प्रतिवद्धता व्यक्त गरे ।
Copyright © All right reserved to webtvkhabar.com Site By: SobizTrend Technology