एजेन्सी
नयाँ दिल्ली । कोलकाता एयरपोर्टमा बुधबार विमान दुर्घटना हुनबाट जोगिएको छ । धावनमार्गबाट गुज्रिरहेको बेला इन्डिगो एयरलाइन्सको विमान एयर इन्डिया एक्सप्रेसको विमानसँग ठोक्किएको थियो ।
चेन्नई जान क्लियरेन्स पर्खेर रनवेमा बसेको एयर इन्डिया एक्सप्रेसको विमानलाई इन्डिगो विमानको एउटा हिस्साले ठक्कर लागेको थियो । पाइलटको लापरबाहीका कारण ठूलो दुर्घटना हुनसक्ने अवस्था देखिए पनि यो घटनामा कुनै यात्रु पनि घाइतेसम्म भएनन ।
उड्डयन नियामक नागरिक उड्डयन महानिर्देशनालयले रनवेमा क्लियरेन्स पर्खेर बसेको विमानलाई ठक्कर दिएकको भन्दै इन्डिगोका दुवै पाइलटलाई कारबाही गरेको छ । इन्डिगोको सो विमान चलाउने दुवै पाइलटलाई महानिर्देशनालयले रोस्टरबाट हटाएको छ । साथै यस विषयमा विस्तृत छानबिन गर्न महानिर्देशनालयले आदेश दिएको छ ।
कोलकाता एयरपोर्टमा बुधबार बिहान इन्डिगोको विमान ट्याक्सी वेबाट गुज्रिरहेको बेला भएको थियो । इन्डिगोले धावनमार्गमा उड्ने तयारीमा रहेको एयर इन्डियाको विमानको एउटा भागमा ठक्कर दिएको थियो । तर ठूलो दुर्घटना भने हुन पाएन ।
एयर इन्डियाका एक वरिष्ठ अधिकारीले इन्डिगो ए ३२० विमानले एयर इन्डिया एक्सप्रेसको उडान ७३७ लाई ठक्कर दिएको बताए ।
एयर इण्डिया एक्सप्रेसका प्रवक्ताले भारतीय समाचार एजेन्सीलाई भनेअनुसार इन्डिगोको पखेटाले ठोक्किएको थियो । ठक्कर लागेपछि उक्त विमानको उडान रोकिएको छ ।
एयर इन्डिया एक्सप्रेसका एक अधिकारीले भने ‘हामी महानिर्देशनालय र एयरपोर्ट प्राधिकरणलाई अनुसन्धानमा सहयोग गरिरहेका छौं ।’
Copyright © All right reserved to webtvkhabar.com Site By: Sobij
