एजेन्सी – इंग्लिस प्रिमियर लिगमा वेष्टह्यामले लेस्टर सिटीमाथि सानदार जित निकालेको छ। यो जित सँगै वेस्ट ह्याम प्रिमियर लिगको अंक तालिकामा शीर्ष स्थानमा उक्लिएको छ । वेस्ट ह्यामले समान ६ अंक भएपनि चेल्सी, लिभरपुल, ब्राइटन र टोटेनहमलाई गोल अन्तरमा पछि पार्दै शीर्षस्थान कब्जा गरेको हो ।
घरेलु मैदानमा वेस्ट ह्यामले १० खेलाडीमा समेटिएको लेस्टर सिटीमाथि ४–१ को फराकिलो जित निकालेको हो । वेस्ट ह्यामको फराकिलो जितमा मिचेल एन्टेनियोले दुई तथा पाब्लो फोर्नाल्स र सेड बेनरहमाले समान एक गोल गरे । लेस्टरका युरी टिलेमान्सले एक गोल फर्काए ।
लन्डन स्टेडियम लन्डनमा सोमबार राति भएको खेलको २६औं मिनेटमा पाब्लो फोर्नाल्सको गोलबाट घरेलु टोलीले अग्रता लिएको थियो । ४०औं मिनेटमा एयोजी पेरेज सिधै रातो कार्ड खाँदै मैदानबाट बाहिरिएपछि लेस्टर समस्यामा परेको थियो ।
५६औं मिनेटमा सेड बेनरहमाले गोल गर्दै वेस्ट ह्यामलाई २–० ले अघि बढाए । उनले मिचेल एन्टेनियोको पासमा गोल गरेका थिए । ६९औं मिनेटमा युरी टिलेमान्सले गोल गर्दै खेललाई २–१ को अवस्थामा ल्याउदै लेस्टरलाई खेलमा फर्कने संकेत दिए ।
८०औं मिनेटमा मिचेल एन्टेनियोले डिक्लन राइसको पासमा गोल गर्दै खेललाई ३–१ को अवस्थामा ल्याए । ८४ औं मिनेटमा मिचेल एन्टेनियोले भ्लादिमर कोउफलको पासमा व्यक्तिगत दोस्रो तथा टोलीका लागि चौथो गोल गर्दै वेस्ट ह्यामलाई सानदार जित दिलाए ।
Copyright © All right reserved to webtvkhabar.com Site By: Sobij
