काठमाडौं । मौसमी परिवर्तनका कारण राप्ती प्रादेशिकका सरकारी तथा निजी अस्पतालमा भाइरल ज्वरोका बिरामीहरुको चाप बढेको छ । तुलसीपुरस्थित राप्ती प्रदेशिक अस्पताल, राप्ती स्वास्थ्य विज्ञान प्रतिष्ठान, लमही अस्पताल, तुलसी बाल अस्पताल, तुलसीपुर सिटी अस्पतालमा दैनिक आउने बिरामीमध्ये ६० प्रतिशतभन्दा बढी रुघाखोकी, टाइफाइड, निमोनियाका छन् । 

मेडिकल सुपरीटेन्डेन्ट डा.विनोद सिंहकाअनुसार राप्ती प्रादेशिकमा दैनिक २०० भन्दा बढी बिरामी उपचारका लागि आउने गरेकोमा अधिकांश वृद्धवृद्धा र बालबालिका रहेका छन् । कोरोना भाइरसको महामारीसँगै भाइरल ज्वरोको प्रकोप पनि फैलिँदै गएको र अघिल्लो वर्षको तुलनामा भाइरल ज्वरोका बिरामी धेरै बढेको उनको भनाई छ । सबै अस्पतालमा भाइरल ज्वरोका बिरामी बढ्दै गएकाले उपचारमा समेत समस्या भइरहेको डा.सिंहले जानकारी दिए ।

त्यसैगरि तुलसी बाल अस्पतालका वरिष्ठ बाल रोग विशेषज्ञ डा.किशोर खत्रीले विगतको तुलनामा केही दिनयता भाइरल ज्वरोका बिरामी बढ्न थालेको जनाए । उनले धेरैमा ज्वरो आउने, टाउको दुख्ने, घाँटी तथा हातखुट्टा दुख्ने, रुघाखोकी लाग्ने, वाकवाकी हुने र कोखा हान्नेजस्ता  लक्षणका  बिरामी उपचारका लागि आउने गरेको बताए । यसकासाथै डा.खत्रीले भाइरल ज्वरो एक प्रकारको भाइरसबाट सर्ने भएकाले यसबाट बच्न अनिवार्य मास्क प्रयोग गर्न  र सरसफाइ  तथा खाने कुरामा ध्यान पुर्याउन सुझाएका छन् । 

सुपरिटेन्डेन्ट डा.सिंहले यस्ता बिरामीमा इन्फेक्सन भएमा स्वासप्रस्वासमा समस्या आउने, रोग प्रतिरोधात्मक क्षमता कम भएकालाई झाडापखाला हुने र समयमै निको नभए निमोनिया पनि हुनसक्ने भएकाले उपचारमा ध्यान दिन र कोरोनासँग मिल्दोजुल्दो लक्षण भएकाले सचेत रहन पनि सुझाएका छन् ।