वेबटिभी खबर
जेरुसेलम । ६ जना प्यालेस्टिनी कैदी इजरायलको सबैभन्दा सुरक्षित मानिने जेलबाट फिल्मी शैलीमा भागेका छन् । इजरायली अधिकारीले भागेका कैदीलाई पक्राउ गर्न ठूलो अभियान चलाइरहेको छ ।
इजरायलको गिल्बाआ जेलमा पछिल्लो महिनादेखि ती कैदीहरुले सुरुङ खनिरहेका थिए । त्यही सुरुङमार्फत् उनीहरु जेलबाट बाहिरी सडकमा निस्किएर फरार भएका हुन् ।
कैदीहरु भागेको खबरपछि प्यालेस्टिनीहरुले खुशी हुँदै सडकमा निस्किएका थिए । किसानहरुले ती कैदी खेतबाट भागेको देखेपछि अधिकारीहरुलाई खबर गरेका थिए । खबरपछि जेलमा कैदी गन्ने क्रममा छ जना थिएनन् ।
भाग्नेमध्ये ५ जना इस्लामिक जिहादका सदस्य हुन् भने एक जना प्यालेस्टाइनको चरमपन्थी संगठन अल अक्सा मार्टर्स ब्रिगेटका पूर्व नेता हुन् ।
इजरायली जेल सेवाका एक अधिकारीले सुरक्षा एवं गुप्तचर एजेन्सीको ठूलो त्रृटि भएको बताएका छन् । भागेका कैदीहरुले आफ्नै बाथरुमबाट सुरुङ खनेका थिए ।
Copyright © All right reserved to webtvkhabar.com Site By: Sobij
