वेबटिभी खबर
झापा । आसन्न चाड तिहारका बेला आगलागी हुनसक्ने सम्भावनालाई दृष्टिगत गर्दै सशस्त्र प्रहरी बल नं. २ गण झापाले भद्रपुर नगरपालिकासँगको सहकार्यमा आगलागी नियन्त्रण सम्बन्धी अभ्यास गरेको छ।
तिहारका बेला दीपावली तथा पटका र अन्य प्रज्वलनशील सामग्रीको प्रयोगबाट आगलागीको घटना हुन गएमा तत्काल उद्धार तथा आगो नियन्त्रण गरि जनधनको क्षति कम गर्ने उद्देश्यले उक्त अभ्यास गरिएको हो।
सशस्त्र प्रहरी कर्मचारीहरूले आगलागी नियन्त्रण तथा उद्धार कार्यसम्बन्धी व्यावहारिक अभ्यास गरेका थिए । यस प्रकारका अभ्यासले विपद् व्यवस्थापनमा सुरक्षाकर्मीको पूर्व तयारी, कार्यक्षमता र समन्वयलाई थप प्रभावकारी बनाउन सहयोग पुग्ने विश्वास लिइएको छ ।
आगलागी तथा अन्य विपद्का घटनामा सुरक्षा र उद्धार कार्यमा सक्रिय भूमिका निर्वाह गर्दै आएको सशस्त्र प्रहरी बल नं. २ गण झापाले सम्भावित जोखिम न्यूनीकरण, विपद् प्रतिकार्य क्षमता अभिवृद्धि तथा स्थानीय तहसँगको सहकार्यलाई प्राथमिकतामा राख्दै आएको छ।
तिहारलाई सुरक्षित र मर्यादित बनाउन आगो तथा विद्युतीय उपकरणको प्रयोगमा सावधानी अपनाउन तथा आगलागीको जोखिम देखिएमा तत्काल सशस्त्र प्रहरी बल वा अन्य सम्बन्धित निकायलाई खबर गर्नसमेत सशस्त्र प्रहरी झापाले सबैमा आग्रह गरेको छ।
Copyright © All right reserved to webtvkhabar.com Site By: Sobij
