काठमाडौं । नेकपा एमालेको विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) ले निवर्तमान सचिवहरू सुदेश पराजुली, वसिम आलम र आरती लामालाई संगठनको साधारण सदस्य समेत नरहने गरी निष्कासन गरेको छ ।
दुई पटकसम्म स्पष्टीकरण माग्दा पनि अटेर गरेपछि कारबाही गरिएको अनेरास्ववियुका अध्यक्ष ऐन महरले जनकारी दिए । महरद्वारा जारी विज्ञप्तिमा मंगलबार तीनजनालाई निष्काशन गरिएको उल्लेख छ ।
केही दिनअघि माधव नेपाल पक्षीय अनेरास्ववियूको भेलाले पराजुलीलाई अध्यक्ष, आलमलाई सह-अध्यक्ष र लामालाई महासचिव चयन गरेपछि ओलीपक्षका साविक विद्यार्थी नेतासँग उनीहरुको खटपट बढेको थियो ।
एमालेको विद्यार्थी संगठनमा समानान्तर गतिविधि गरेको भन्दै महरले ती नेतालाई चैत १५ गते र चैत २२ गते दुईपटक स्पष्टीकरण सोधेका थिए ।
‘स्पष्टीकरण सोद्धा पनि साथीहरूबाट जवाफ नआएकाले उहाँहरूलाई संगठनबाट निष्काशन गरिएको हो,’ महरले भने ।
एमालेले यस अघि माधवकुमार नेपाल, भीम रावल, सुरेन्द्र पाण्डे र घनश्याम भुसाल र अर्घाखाँजी जिल्ला कमिटीका तीनसहित सातजना शीर्ष नेतालाई पार्टीका साधारण सदस्यसमेत नरहने गरी ६ महिनाका लागि निलम्बन गरिसकेको छ ।
Copyright © All right reserved to webtvkhabar.com Site By: Sobij
