वेबटिभी खबर
नयाँ दिल्ली । ओमिक्रोन भेरियन्टले फैलाएको कोरोना संक्रमणको आतंक भारतमा क्रमशः कमजोर हुँदै गएको छ । भारतमा दुई दिनयता दैनिक संक्रमित ७० हजारभन्दा कम पाइएका छन् ।
भारतमा मंगलबार रातिसम्म गरिएको परीक्षण नतिजाअनुसार ६९ हजार ५४४ जना कोरोना भाइरसका नयाँ संक्रमित थपिएका छन् । केही दिनयता लगातार संक्रमितको संख्या घटे पनि सोमबारको तुलनामा भने यो संख्या करिब दुई हजार बढी हो ।
त्यसैगरी यो अवधिमा एक लाख ७२ हजार जना संक्रमणमुक्त भएका छन् । संक्रमित थपिनेभन्दा निको हुने बढी हुँदै गएपछि अहिले भारतमा उपचाररत रहेका संक्रमितको संख्या निकै कम भएको छ । हाल भारतमा ८ लाख ८३ हजार सक्रिय संक्रमित रहेको भारतको स्वास्थ्य मन्त्रालयले जनाएको छ ।
भारतमा कोरोना संक्रमणका कारण निधन हुनेको संख्या भने स्थिर छ । मंगलबार एक हजार २१५ जनाको संक्रमणका कारण निधन भएको छ ।
Copyright © All right reserved to webtvkhabar.com Site By: Sobij
