लमजुङ । लमजुङको करापुटार-डढुवा-साल्मे भञ्ज्याङ सडकखण्ड अन्तर्गत करापुटार डढुवा सडकखण्डमा आरसिसी ढलानको काम अघि बढाइएको छ । मध्यनेपाल नगरपालिका र क्व्होलासोथर गाउँपालिका जोड्ने यस सडकखण्ड अन्तर्गत मध्यनेपाल-७ करापुटारदेखि वडा नं ८ डढुवासम्मको ९ किमी ढलान कार्य अघि बढेको हो ।

सडक ढलान गर्नका लागि गण्डकी प्रदेश सरकारको ३१ करोड २३ लाख ३० हजार २६९ लागतमा निर्माण कार्य अघि बढेको पूर्वाधार विकास कार्यालयले जनाएको छ । कार्यालयका अनुसार हाल सडकको पर्खाल लगाउने, नाली बनाउने, कटिङ गर्नेलगायतका कार्य भइरहेको छ ।

९ किमी ढलान हुने यस सडकखण्डको जंगल रहेको ४ किमीमा सडकको चौडाइ ४ मिटर ढलान हुने र अरु बाँकी भागमा ५ मिटर ढलान हुने तथा ढलान मोटाइ भने २० सेन्टिमिटरको हुने पूर्वाधार विकास कार्यालयका इञ्जिनीयर राजेश अधिकारीले बताए ।

उनकाअनुसार रसुवा जयदम्बा जेभी धादिङले २०७८ असोज १३ मा निर्माणको सम्झौता गर्दै दुई वर्षमा सक्ने छ । हालसम्म यस सडकखण्डको कार्य ८ प्रतिशत मात्र सम्पन्न भएको पूर्वाधार विकास कार्यालयले जनाएको छ ।

त्यस्तै यस करापुटार-डढुवा-साल्मे भञ्ज्याङ सडक अन्तर्गत नै ढलान हुने उक्त डढुवादेखि साल्मेसम्मको सडकखण्ड स्तरोन्नति कार्य भइरहेको छ । करिब ८ किमी सडकखण्डमा ग्राभेल, नाली, तारजाली, मेशिनरी पर्खाल, बाटो चौडाइ गर्ने कार्य भइहेको पूर्वाधार विकास कार्यालयले जनाएको छ ।

प्रदेश सरकारको लगानीमा १७ करोड १५ लाख ४१ हजार ४५४ भ्याटसहित मोतिदान कम्पनीले सडक स्तरोन्नतिको जिम्मा लिएको छ । नालासहित ८ मिटर चौडाइको सडकखण्ड हुने भएको छ । यसको निर्माण अवधि दुई वर्षको भएपनि समय सकिसके पनि काम भने सम्पन्न भएको छैन ।

हालसम्म ७५ प्रतिशत मात्र निर्माण कार्य सम्पन्न भएको पूर्वाधार ईञ्जिनीयर अधिकारीले बताए । निर्माण सम्झौता अनुसार म्याद यही फागुन ६ गतेसम्म रहेको थियो । शुक्रबार म्याद थप गर्दै आगामी असार भित्रमा सम्पन्न गर्ने गरी निर्माण कार्य अघि बढाइएको छ ।

यहाँ सडक स्तरोन्नति र ढलान हुन लागेपछि स्थानीय हर्षित भएका छन् । ग्रामीण कच्ची सडकमा जोखिमपूर्ण यात्रा गर्दै आएका स्थानीय सहजरुपमा र केही समयसमेत छोटिने भएको छ ।