ब्राजिलिया । ब्राजिलमा कोरोना भाइरसको महामारीले एकतर्फ दैनिक हजारौं मानिसको मृत्यु भइरहेको छ । समाधिस्थलमा शव गाड्ने ठाउँसमेत छैन । अर्कोतर्फ, करिब दुई करोड मानिस भोकमरीसँग जुधिरहेका छन् ।
२१ करोड जनसंख्या भएको देशमा करिब आधा जनसंख्याले राम्रोसँग खान पाइरहेका छैनन् । ब्राजिलको खाद्य सम्प्रभूता एवम् पोषण सुरक्षा अनुसन्धान नेटवर्कले जारी गरेको एक रिपोर्टमा महामारीपछि ब्राजिलमा देखिएको खाद्य संकटबारे उल्लेख गरिएको छ ।
नेटवर्कका अध्यक्ष रेनाटो मालुफकाअनुसार सहरमा मानिसहरू सडक-सडकमा खानेकुरा माग्न सक्ने अवस्था रहे पनि ग्रामीण क्षेत्रमा हालात निकै नाजुक रहेको बताउँछन् ।
विज्ञहरूको भनाइमा महामारीले बेरोजगारीसँगै महंगी नियन्त्रणभन्दा बाहिर पुगेपछि त्यहाँ मानिसहरू भोकै हुन थालेका छन् ।
ब्राजिलियन इन्स्टिच्युट अफ ज्योग्राफी एन्ड स्टेटिक्सकाअनुसार गत एक वर्षमा देशमा धानको मूल्य ७० प्रतिशत र घरेलु ग्यासमा २ प्रतिशत वृद्धि भएको छ । रोजगारीको सिलसिलामा अमेरिका पुगेका ब्राजिलका नागरिकहरू पनि त्यहाँ खोप लगाउन नपाउँदा काम गर्न पाएका छैनन् । त्यहाँ पनि उनीहरू आर्थिक समस्यामा परेका छन् ।
ब्राजिलमा अहिलेसम्म एक कराेड ३६ लाख मानिस काेराेना भाइरसबाट संक्रमित भएका छन् । संक्रमणबाट ज्यान गुमाउनेकाे संख्या तीन लाख ५८ हजार सात सयमाथि पुगेकाे छ ।
Copyright © All right reserved to webtvkhabar.com Site By: Sobij
