वेबटिभी खबर
आज धर्तीमा एउटा अनुपम छटा देखिएको छ
सूर्य र हिमालको प्रणय छताछुल्ला पोखिएको छ
सूर्यले हिमालको सिउँदो सजाइदिंदा
हिमाल मदहोस् भएर झुमिदिंदा
आज आकाशमा बिछट्टै उज्यालो फैलिएको छ
नाप्नै नै हो भने
आज हिमाल एकबित्ता अग्लेको छ
नलग्लिनु पनि किन ?
त्यो उसको प्राकृतिक अधिकार हो
आज उसको सूर्यको जन्म दिन हो ।
माथि त्यो हल्लीखल्ली चलिरहँदा
तल हिमनदी....?
सूर्यसँग प्रेम बसेपछि नै हो
हिमनदी आफ्नो लयमा बग्न थालेको
हास्न बिर्सिसकेको ऊ हास्न थालेको थियो
पलपल मर्दै गइरहेको ऊ बाँच्न थालेको थियो
आज भने ऊ टक्क रोकिएको छ
कति पेचिलो छ,
सत्यता बाध्यता समाज र विधताको कथा
जीवन, जगत् प्रेम अनि नैतिकताको कथा
माथि शिखरमा प्रेम उत्सव छ
खोँचमा प्रेम चीत्कार छ
आज हिमनदी हिममैदान बनेको छ ।
आज समयले एउटा नयाँ प्रश्न सोधेको छ
आज प्रेमले एउटा नयाँ उत्तर खोजेको छ
आँसु त हत्केलाले पुछ्न सकिन्छ
मुटु केले पुछ्ने होला ?
Copyright © All right reserved to webtvkhabar.com Site By: Sobij
