वेबटिभी खबर
चितवन । कृषि तथा वन विज्ञान विश्वविद्यालय, रामपुर चितवन र अन्तर्राष्ट्रिय एकीकृत पर्वतीय विकास केन्द्र (इसीमोड) का बीच द्विपक्षीय सम्झौता भएको छ ।
अनुसन्धान, ज्ञान सिर्जना अध्ययन अनुसन्धानका नतिजा प्रसार, हरित कृषिको प्रवर्द्धन र जलवायुमैत्री तरिकाबाट नेपालको पर्वतीय क्षेत्रमा कृषि, वन र वातावरण क्षेत्रमा सहयोग गर्न सम्झौता गरिएको हो ।
विश्वविद्यालयका उपकुलपति प्रा डा.पुण्यप्रसाद रेग्मी र इसीमोडका महानिर्देशक डा.पेमा ग्याम्त्सोले सम्झौतापत्रमा हस्ताक्षर गरेका हुन्।
द्विपक्षीय सम्झौताबाट दुई संस्थाबीच अध्ययन, सहकार्यमा तयार गरिने अनुसन्धान प्रस्तावना, शिक्षक एवम् विद्यार्थीको क्षमता वृद्वि र अन्य शैक्षिक कार्य सञ्चालन गर्न सकिने सम्भावना रहेको विश्वविद्यालयका योजना निर्देशक डा.शिवचन्द्र ढकालले जानकारी दिए ।
सहकार्यबाट सहभागिता मूलक अनुसन्धान र प्रसारका क्रियाकलापलाई लागू गर्न विश्वविद्यालयअन्तर्गतको अनुसन्धान एवम् प्रसार निर्देशनालयलाई जिम्मेवार निर्देशनालयकोरूपमा तोकिएको छ ।
विश्वविद्यालयका अनुसन्धान एवम् प्रसार निर्देशक प्रा डा.अर्जुनकुमार श्रेष्ठका अनुसार इसिमोडबाट कर्णाली प्रदेश र सुदूरपश्चिम प्रदेशमा लागू हुन लागेको ब्रेस-ग्रेप परियोजनाको अनुसन्धान मूलक कार्यक्रममा कृषि तथा वन विज्ञान विश्वविद्यालयले प्राविधिक सहयोग, साझेदारीमा अनुसन्धान, तालिम, प्रसार, गोष्ठी आदि कार्यमा नेतृत्वदायी भूमिकामा सहयोग गरिने छ ।
Copyright © All right reserved to webtvkhabar.com Site By: Sobij
