मिन्स्क । बेलारुसमा राष्ट्रपति अलेक्ज्याण्डर लुकासेन्कोको आदेशमा २६ वर्षीय पत्रकार रोमन दिमित्राइविच प्रोटासेभिचलाई गिरफ्तार गर्न उडिरहेको विमान मोडेर अवतरण गरिएको छ ।

प्रोटासेभिच ग्रीसबाट लिथुआनिया जाँदै गर्दा उनी सवार विमानलाई बेलारुसले बम भएको भन्दै उसको राजधानी मिन्स्कमा ओरालेको थियो ।

विमानमा बम भएको अफवाह फैलिएपछि फाइटर जेट मिग २९ को सहयोगमा जमिनमा ओरालेर ६० जना सैनिक जवानले लुकासेन्को सरकारको कट्टर आलोचक पत्रकार प्रोटासेभिचलाई पक्राउ गरेका थिए । 

आइतबार र्‍यानएअरको विमान ग्रीसको एथेन्सबाट भिल्नियसतर्फ जाँदै गर्दा लिथुआनियाली सिमानानजिकै पुगेपछि मिन्स्कतर्फ मोडाइएको थियो । उक्त विमानमा १७१ जना यात्रु रहेका थिए । 

पत्रकारको पक्राउपछि युरोपेली संघ, जर्मनी, फ्रान्स, बेलायत तथा अमेरिकाले बेलारुसको आलोचना गरेका छन् । जर्मनीका विदेश मन्त्री हाइको मासले सरकारले गम्भीर अपराध गरेको आरोप लगाएका छन् । यी पश्चिमी देशहरुले रोमनको तुरुन्त रिहा गर्ने मागसमेत गरेका छन् । 

पत्रकार रोमनले विश्वविद्यालय पढ्दै गर्दा राष्ट्रपति को विरोध गर्न एक सोसल नेटवर्किंग समूह बनाएका थिए । यसलाई सरकारको आदेशमा सन् २०१२ मा ह्याक गरिएको थियो । सरकारको आलोचना गरेपछि स्टेट युनिभर्सिटीले उनलाई देश द्रोह र दंगा भड्काएको आरोपमा निष्किासित गरेको थियो ।

पछि अदालतले यी सबै आरोपमा सफाइ दिएपछि पोल्यान्ड गएर राजनीतिक शरण मागेका थिए । उनले त्यहाँ पनि नेक्स्टा नामको युट्युब च्यानल चलाएर बेलारुस सरकारको विरोध गरिरहेका थिए । सरकारले रोमनविरुद्ध मुद्दा चलाएर आतंककारीको आरोपमा मृत्युदण्डको सजाय सुनाएको थियो । 

युरोपेली मुलुक बेलारुसमा नयाँ प्रजातान्त्रिक नेतृत्व तथा आर्थिक सुधारको माग गर्दै आन्दोलन भइरहेको छ । करिब ९५ लाख जनसंख्या भएको बेलारुस यूक्रेनजस्तै पश्चिमेली तथा रुसको द्वन्द्वमा चेपिएको मुलुक हो ।