सर्लाही । चुनावका बेला जनताको मन जित्न उम्मेदवारले धेरै किसिमका प्रतिवद्धता व्यक्त गर्छन । तर चुनावपछि ती प्रतिवद्धता विर्सने गरेको आम जनताले गुनासो गरेको जताततै सुन्न पाइन्छ । यसै कारण पनि जनप्रतिनिधिसँग जनता टाढिने गर्छन ।

तर चुनाव हारेर पनि आफूले जनतासँग गरेको प्रतिवद्धतालाई पुरा गर्ने अभियानमा लागेका छन–सर्लाहीको संसदीय क्षेत्र नम्बर ३ बाट उम्मेदवार बनेका समाजसेवी नरेन्द्र साह । सो क्षेत्रबाट गत संसदीय निर्वाचनमा वाम–लोकतान्त्रिक गठबन्धनबाट उम्मेदवार बनेका साहले चुनावी नतिजा जे भए पनि आफूले गरेको प्रतिवद्धता पुरा गर्न सुरु गरेका हुन् । 

चुनाव जितेर पनि प्रतिवद्धता पुरा नगर्ने जनप्रतिनिधिका कारण हैरान भएका जनता साहको कामबाट भने दंग परेका छन् । साहले चुनावका बेला घरदैलोमा जाँदा त्याहाँका जनताले सार्वजनिक ठाउँमा सफाइ गर्न घाँस तथा बुट्यान काट्दै गरेको देखे । धेरै ठाउँमा गाउँलेसँगै सरसफाइमा उनी पनि जुटे । त्यही बेला उनले सार्वजनिक सडक, ग्रामिण सडक र बस्ती आसपास घाँस तथा बुट्याउनले बनाउने फोहोर सफा गर्न मेशिन उपलब्ध गराउने वाचा गरे । सोही वाचाअनुसार साहले हरिवन नगरपालिकालाई घाँस तथा बुट्यान काट्ने मेशिन हस्तान्तरण गरेका छन् । 

डेंगु तथा अन्य जिवाणुका कारण सरुवा रोगहरु बढ्दै गएका बेला गाउँबस्ती सफा राख्ने उपकरण गाउँगाउँमा पुग्दा जनतालाई धेरै राहत पुगेको छ । साहले सोही निर्वाचन क्षेत्रमा पर्ने हरिवन नगरपालिकाका मेयर रमेश बुढाथोकी ‘कमल’लाई तीन थान सफाइ उपकरण हस्तान्तरण गरेका छन् । 

मेयर बुढाथोकीले धेरै मानिसले गर्नु पर्ने काममा उपकरण प्रयोगपछि धेरै सहज हुने बताए । ‘उपकरणको प्रयोग गर्दा नगरलाई जतिबेला पनि स्वच्छ र सफा राख्न ठूलो मद्दत पुग्छ,’ बुढाथोकीले भने, ‘यसले गाउटोल सफा हुने मात्र नभई रोगको संक्रमणबाट पनि जनतलाई बचाउन मद्दत गर्छ । यो स्वास्थ्य र सफाइ दुबै प्रयोजनका लागि अत्यन्त उपयुक्त छ । 

बुढाथोकीले चुनाव हारेर पनि जनतासँग गरेको प्रतिवद्धताअनुसार सफाइका लागि अत्यावश्यक मेशिन उपलब्ध गराउनुलाई राजनीतिक इमान्दारीको संज्ञा दिए । ‘नरेन्द्र जीले राजनीतिक इमान्दारी देखाउनु भएको छ,’ उनले भने, ‘उहाँले जनतासँग गरेको वाचा कुनै हालतमा विर्सनु हुँदैन भन्ने एकदमै सकारात्मक सन्देश दिनु भएको छ । सम्पूर्ण नगरबासी र क्षेत्र नम्बर ३ का जनताको तर्फबाट म नरेन्द्र जीलाई धन्यवाद दिन्छु र सबै नेतालाई जनतासँगको प्रतिवद्धता पुरा गर्न यो उदाहरणले प्रेरित गर्ने विश्वास लिएको छु ।’

मेशिनले सहजै र छिटो घाँस तथा बुट्यान काट्छ । यसको प्रयोगपछि कम जनशक्तिमै सहजै सफाइ गर्न सकिन्छ । साहले यस्तै मेशिन आफू उम्मेदवार भएको क्षेत्रमा पर्ने बरहथवा नगरपालिका, बागमती नगरपालिकालाई पनि हस्तान्तरण गर्दैछन् । 

‘मेरो क्षेत्रमा पर्ने ५१ वटै वडामा सफाइका लागि यो मेशिनको क्रमशः पुर्याउने योजना छ,’ साहले भने भने, ‘जनतासँग गरेको वाचालाई पुरा गर्नुपर्छ भन्ने मेरो दृढ मान्यता हो । चुनावी नतिजा जे भए पनि जनतालाई नेताले ढाँट्नु हुँदैन र वाचा पुरा गर्न प्रयत्नरत रहनुपर्छ ।’

संविधानसभा सदस्यसमेत रहेका साह समाजसेवीको रुपमा जिल्लामा परिचित छन् । उनले कोरोना कहरका बेला पनि सर्लाहीमा मास्क, सेनिटाइजरजस्ता सामान उपलब्ध गराएर जनतालाई रोगको जोखिममा पर्नबाट जोगाउन सहयोग गरेका थिए । त्यसैगरी गाउँघरको बाटोघाटो बिग्रँदा पनि उनले आफ्नो व्यक्तिगत खर्चमा मर्मतजस्ता काम गर्दै आएका छन् । सुरक्षा निकायलाई गस्तीका लागि साइकल उपलब्ध गराउनेदेखि जुनसुकै परिस्थितिमा पनि सहयोगलाई निरन्तरता दिएकाले जनताबीच उनको लोकप्रियता बढ्दै गएको छ ।