वेबटिभी खबर
जनकपुर । उपचार खर्च तिर्न नसक्दा जनकपुरको एक निजी अस्पतालमा चार दिनदेखि एकजना सुत्केरी बन्धक भएकी छिन् ।
जनकपुरको आर्या केयर अस्पतालमा धनुषा क्षीरेश्वरनाथ नगरपालिका–५ महेन्द्रनगरकी ३० वर्षीया बेगम खातुन चार दिनदेखि बन्धक बनेकी हुन् । ब्यथा लागेपछि यही असार १७ गते अस्पताल भर्ना भएकी उनको शल्यक्रियाबाट जुम्ल्याहा बच्चाको जन्म भयो ।
असार २१ गते नै खातुनलाई अस्पतालले डिस्चार्ज गरे पनि उपचारमा लागेको खर्च एक लाख १० हजार बुझाउन नसक्दा उनी चार दिनदेखि अस्पतालमै बन्धक बनेकी छन् ।
अस्पताल प्रशासनले उनलाई जनरल वार्डमा राखेर घर जानबाट वञ्चित गरेको छ । खातुनका ३१ वर्षीय श्रीमान् मोहम्मद समीर नदाफले आफन्त र गाउँमा अस्पताललाई तिर्नुपर्ने पैसा खोजे पनि पूरा रकम व्यवस्था गर्न सकेको छैनन् । लकडाउनका कारण देखाएर ऋण नपाउँदा उनी अस्पतालमा चार दिनदेखि घेरिएको नदाफले बताए ।
दैनिक ज्याला मजदूरी गरी जीविकोपार्जन गर्दै आएका नदाफको न आफ्नो घर छ, न त काम । उपचार खर्च तिर्न नसक्दा श्रीमती र नवजात शिशुलाई अस्पतालबाट घर ल्याउनका लागि केही दिनयता गाउँमा चारैतिर घुमेर चन्दा संकलन गरिरहेको नदाफले बताए ।
चन्दाबाट करिब ५० हजार रुपैयाँ संकलन भएको र बाँकी ६० हजार जुटाउन नसकेको उनी बताउँछन् । अस्पताल प्रशासनले बिरामीको आर्थिक अवस्था हेरेर केही छुट गर्न सक्ने तर सबै उपचार खर्च मिनाहा गर्न नसकिने बताएको छ । अस्पताल प्रशासनका अनुसार दुवै बच्चालाई आइसियुमा राखेर उपचार गर्नुपरेकाले खर्च बढेको हो । अस्पतालले गर्नसक्ने जति सक्दो छुट गर्नेछ ।
Copyright © All right reserved to webtvkhabar.com Site By: Sobij
