काठमाडौं । प्रमुख प्रतिपक्षी नेकपा एमाले केन्द्रीय कमिटीको १० औं बैठक मंगलबार जारी छ । ललितपुरको च्यासलस्थित तुल्सीलाल स्मृति प्रतिष्ठानमा बसेको बैठक सोमबार बसेकै बैठकको निरन्तरता हो । बैठकमा पार्टी एकताका लागि गठित (हाल विघटित) कार्यदलले तयार पारेको १० बुँदे सहमति केन्द्रीय सदस्यहरूलाई वितरण गरिएको छ । 

कार्यदलका तर्फबाट स्थायी कमिटी सदस्य सुवासचन्द्र नेम्वाङले उक्त सहमति कार्यान्वयनमा इमान्दार हुन केन्द्रीय सदस्यहरुसमक्ष अपिल गरेका छन् ।एमालेले पार्टी अध्यक्ष केपी शर्मा ओली र वरिष्ठ नेता माधव नेपालबीचको विवाद समाधानका लागि यही २ जेठमा दुर्व पक्षबाट ५, ५ सदस्य रहने गरी कार्यदल गठन भएको थियो । 

२ महिनापछि कार्यदलले पार्टी विवाद मिलाउन २७ असारमा १० बुँदे सहमति निकालेपछि कार्यदल निष्क्रिय भइसकेको छ । मंगलबार जारी केन्द्रीय कमिटीको बैठकमा प्रधानमन्त्री शेरबहादुर देउवालाई विश्वासको मत दिने वरिष्ठ नेता नेपालसहित २२ सांसदलाई कारबाहीको थप प्रक्रियाबारे पनि छलफल गर्ने बताइएको छ । 

एमाले संस्थापनले ती सांसदहरूलाई अनुशासनको कारबाहीका लागि सोमबार (हिजो) बसेको बैठकले नै २४ घण्टे स्पष्टीकरण सोधिसकेको छ । तर २४ घण्टा बितिसक्दा पनि नेपालसहितका सांसदले स्पष्टीकरणको जवाफ बुझाएको छैन । उनीहरुले पार्टीलाई स्पष्टीकरण नदिने भन्दै आएका छन् । स्पष्टीकरण दिन पार्टीले दबाब दिए आफूहरुले पार्टीविरुद्ध मुद्दा हाल्ने चेतावनी दिएका छन् । 

जारी बैठकमा प्रदेशमा एमाले ओली पक्षको अवस्था, ओली नेतृत्वको सरकारले गरेका कामको समीक्षा गर्दै आगामी दिनमा राजनीतिक र सांगठानिक काममा पार्टीको भूमिकाबारे पनि छलफल गर्ने बताइएको छ ।