एजेन्सी । कोरोना महामारी नियन्त्रणमा अमेरिका गलत दिशातिर गइरहेको अमेरिकाका प्रमुख स्वास्थ्यविज्ञ एन्थोनी फाउचीले जनाएका छन् । खोप नलगाएका व्यक्तिहरूमा सङ्क्रमण बढिरहेका बेला अमेरिकाले सक्दो चाँडो सबै जनतालाई खोपको दायराभित्र समेट्न नसके डेल्टा भेरियन्टको संक्रमण फैलिने जोखिम रहेको बताएका छन् ।
फाउचीले स्वास्थ्य अधिकारीहरूले स्थितिलाई नियन्त्रणमा लिनका निम्ति खोप लगाएका अमेरिकीहरुलाई पनि मास्क अनिवार्य गर्ने कुराबारे विचार गरिरहेको जनाएका छन् । उनले कमजोर व्यक्तिहरूलाई प्रतिरक्षा बढाउने खाले खोप दिने कुरा पनि समीक्षाका क्रममा रहेको बताएका छन् । खोप नलगाएकाहरूका बीचमा अमेरिकामा कोरोनाभाइरस ‘एउटा महामारी बनेको’ उनको भनाइ छ ।
आइतवार सीएनएनसँग कुरा गर्दै अमेरिकी राष्ट्रपति जो बाइडनका प्रमुख चिकित्सा सल्लाहकार फाउचीले यस्तो धारणा सार्वजनिक गरेका हुन् । अमेरिकामा हालसम्म त्यहाँको जनसङ्ख्याको ४९ प्रतिशतले पूर्ण रूपमा खोप लगाइसकेको आधिकारिक विवरणमा देखिन्छ । अमेरिकामा गत एप्रिलदेखि खोप लगाउने दरमा कमी देखिएको छ ।
Copyright © All right reserved to webtvkhabar.com Site By: Sobij
