वेबटिभी खबर
काठमाडौं । नेकपा एमालेका सांसद भीम रावलले अमेरिकी सहायता परियोजना (एमसीसी) संशोधन नगरी अनुमोदन गरिनु राष्ट्रघाती कदम हुने दाबी गरेका छन् । शुक्रबार प्रतिनिधिसभाको बैठकमा बोल्दै रावलले एमसीसीसँगै भएका अन्य सहायक सम्झौता पनि सार्वजनिक गर्न माग गरे ।
‘एमसीसीसँगै भएका अन्य सम्झौता पनि सार्वजनिक होस् । त्यो जनताले थाहा पाउनुपर्छ । एमसीसीमा रहेको देशहितविपरीतका प्रावधान नसच्याइ अनुमोदन गरिए त्यो राष्ट्रघात हुनेछ,’ एमाले उपाध्यक्षसमेत रहेका रावलले भने ।
देशको अस्मिता, सार्वभौमसत्ता र सामरिक महत्वसँग जोडिएर एमसीसी आएकाले त्यसलाई यत्तिकै स्वीकार गर्न नसकिने रावलले बताए । ‘यसमा रहेका प्रावधान हटाएर, संशोधन गरेर अनुमोदन गर्नुपर्छ । त्यो कुनै सामरिक कुरासँग जोडिएर आउनु हुँदैन । यसमा भएका गोप्य सम्झौता बाहिर ल्याउन जरुरी छ,’ उनले भने ।
सरकारले आवश्यक खोजविन र छलफल नै नगरी उक्त परियोजनाको पक्षमा रेडियो र टेलिभिजनबाट विज्ञापन बजाएर जनतामा भ्रम छरिरहेको रावलले दाबी गरे ।
Copyright © All right reserved to webtvkhabar.com Site By: Sobij
