एजेन्सी
नयाँ दिल्ली । नेपालमा जस्तै भारतमा पनि जंगलमा आगलागीको घटना निकै बढेको छ । जंगलमा आगो लगाएको अभियोगमा भारतमा ५२ जनालाई पक्राउ गरि मुद्दा चलाइएको छ ।
उत्तराखण्ड राज्यमा पछिल्लो २४ घण्टामा आगलागीका ४३ घटनामा ६२ हेक्टर वन क्षेत्र जलेर नष्ट भएको छ । आगोले नोक्सान गरेको वन क्षेत्र जोगाउन सरकारले आफ्नो सबै शक्ति लगाएको छ । तर पनि आगलागीका घटनामा कमी आउन सकेको छैन ।
यो सुख्खा मौसममा मात्र भारतमा ८०४ घटनामा १ हजार ११ हेक्टर वन क्षेत्रमा आगलागी भएको छ । उत्तराखण्डमा अहिले पनि वन क्षेत्रमा आगो फैलने क्रम जारी नै छ । वन विभागले सेनाको सहयोगमा आगो नियन्त्रणको प्रयास जारी राखेको छ । केही उच्छृंखल तत्वले वनमा आगो लगाएर समस्या बढाएको वन विभागले जनाएको छ ।
वनमा आगो लगाइएको घटनामा यो मौसममा मात्र वन संरक्षण ऐन र वनमा आगो लगाउने अपराध अन्तर्गत ३१५ मुद्दा दर्ता भएका छन् । जसमा २६७ वटा अज्ञात र ४८ जना पहिचान भएका व्यक्ति विरुद्ध मुद्दा परेको छ ।
आगलागीका घटना बढेपछि वन विभागले राज्यको मुख्यालयमा नियन्त्रण कक्ष स्थापना गरेको छ । साथै वनमा लागेको आगलागीबारे जानकारी दिन हेल्प लाइन नम्बरहरु पनि सार्वजनिक गरेको छ ।
Copyright © All right reserved to webtvkhabar.com Site By: Sobij
