रासस
महोत्तरी । गर्मी बढेसँगै महोत्तरी जिल्लाको सदरमुकाम जलेश्वरमा पानी सुक्न थालेको छ ।
खानेपानीको कमी भएपछि जलेश्वर नगरपालिकाले नगर क्षेत्रमा ट्याङ्करबाट पानी वितरण गर्न थालेको छ । पछिल्लो समय यहाँका धारा, चापाकल र अन्य पानीका स्रोतबाट पानी आउन छाडेको छ । जलेश्वर नगरपालिकाका प्रमुख सुरेश साह सोनारले नगरको विभिन्न वडामा ट्याङ्करबाट पानी वितरण भइरहेको जानकारी दिए ।
१२ वडा रहेको जलेश्वर नगर क्षेत्रभित्रका १२ हजार तीन सय ८० घरधुरीमा अधिकांस धार जडान भएका छन् । गर्मीसँगै सुख्खासमेत रहेकाले धारा र चापाकल सुकेर पानी आउन बन्द भएको हो । मधेस प्रदेशका भू तथा वातावरणविज्ञ बेचन महतोले नगर क्षेत्रभित्रको जलस्तर कम हुँदा पानीका स्रोत सुकेको बताए ।
जलेश्वरमा यसअघि कहिले पनि पानीको अभाव भएको थिएन । जिल्लाको उत्तरी क्षेत्रमा अवस्थित बर्दिबास , गौशाला, भङ्गहा, औरही, बलवा, रामगोपालपुर नगरपालिका र सम्सी गाउँपालिकामा पनि पानीको समस्या भएको बताइएको छ । महोत्तरीका प्रमुख जिल्ला अधिकारी दीपककुमार पहाडीले खानेपानीको अभाव हुन नदिन काम भैराखेको जानकारी दिए ।
चुरे विनास र पोखरीहरु पुरेर प्लटिङ हुन थालेपछि समथर भुभागमा पानीको कमी हुन थालेको हो । ‘ग्राउण्ड वाटर रिचार्ज’ का लागि घना वन र जलाधार क्षेत्रको संरक्षण जरुरी भएको स्थानीयले बताएका छन् ।
Copyright © All right reserved to webtvkhabar.com Site By: Sobij
