काठमाडौं । भारतमा विस्तारै सहरहरु अनलक हुने प्रक्रियामा छन् । दिल्लीमा सोमबारबाट जिम, योग सेन्टर एवं ब्यांक्वेट हल खोल्न अनुमति दिइयो । अन्य केही राज्यले पनि प्रतिबन्ध खुकुलो बनाउन थालेका छन् । तर भारतमा तेस्रो लहर आउन सक्ने चेतावनी दिँदै मास्क लगाउन र सामाजिक दुरी कायम गर्न विज्ञहरुले सल्लाह दिएका छन् । यसैबीच विश्वका कतिपय देशमा डेल्टा भेरिएन्टको संक्रमण तीव्र रुपमा फैलिएको छ । 

अष्ट्रेलिया
अष्ट्रेलियाको सिड्नी सहरमा अहिलेसम्म १ सय २८ जनामा कोरोना संक्रमण पुष्टि भएको छ । संक्रमण बढ्न थालेपछि सिड्नीमा ९ जुलाईसम्म लकडाउन गरेको छ । योबाहेक क्विन्सल्यान्ड र पश्चिमी अष्ट्रेलियामा पनि नयाँ संक्रमित भेटिएका छन् । संक्रमण बढेपछि  प्रधानमन्त्री स्कट मरिसनले आपतकालीन बैठक बोलाएका थिए । चार राज्यले सीमा बन्द गरेका छन् । सिड्नी र डार्विन सहरमा लकडाउन लागू गरिएको छ । 

जोन हप्किन्स विश्वविद्यालयका अनुसार एक सातामा अष्ट्रेलियामा १७३ संक्रमित भएका छन् । यो संख्या पछिल्लो १० महिनामा सबैभन्दा धेरै हो । अष्ट्रेलियामा अहिलेसम्म ४ प्रतिशत जनसंख्यालाई खोप लगाइसकेको छ । 

बंगलादेश 
बंगलादेशमा पनि कोरोना भाइरसको संक्रमण बढ्दै गइरहेको छ । २७ जुनमा ११९ जनाको कोरोना संक्रमणबाट मृत्यु भएको थियो । जोन हप्किन्स विश्वविद्यालयका अनुसार बंगलादेशमा कोरोना भाइरसबाट मृत्यु भएको यो संख्या सर्वाधिक हो । संक्रमण बढेपछि बंगलादेशले सोमबार तीन दिन लकडाउन गर्ने घोषणा गरेको छ । त्यहाँ सार्वजनिक यातायात बन्द गरिएको छ र सरकारी एवं गैरसरकारी संस्थाहरुमा सीमित संख्यामा कर्मचारी राख्न अनुमति दिइएको छ । खाद्यान्न पसलहरु बिहान ८ देखि राति ८ बजेसम्म खोल्न अनुमति दिइएको छ । 

रुस 
रुसमा पनि कोरोना भाइरसको संक्रमण बढ्दै गएको छ । जुन २० देखि २६ सम्म रुसमा ३८ सय भन्दा बढीको संक्रमणबाट ज्यान गएको छ । एक सातामा यति धेरै संख्यामा मृत्यु भएको रुसमा पहिलोपटक हो । यही अवधिमा एक लाख ३२ हजार संक्रमित थपिएका छन् । जनवरीपछि लगातार नयाँ संक्रमण घट्दै गएको रुसमा डेल्टा भेरिएन्टका कारण फेरि केसहरु बढेको समाचार एजेन्सी रोयटर्सले जनाएको छ । अष्ट्रेलिया, बेलायत, रुससहित यस भेरिएन्टको खतरा विश्वका ८५ देशमा बढ्दै गइरहेको छ । रुसमा अहिलेसम्म ११ प्रतिशत जनसंख्यालाई खोप लगाइसके पनि खोपको अभावका कारण अहिले लगाउन सकेको छैन । संक्रमण बढेपछि मस्कोसहित केही क्षेत्रमा प्रतिबन्ध लगाएको छ ।

थाइल्यान्ड र इन्डाेनेशिया

थाइल्यान्डमा पनि बंगलादेशको जस्तै अवस्था भएको छ । जुन महिनामा अहिलेसम्म ९ सय ९१ जना संक्रमितको मृत्यु भएको छ । त्यहाँ मे महिनाबाट नै संक्रमण बढ्न थालेको थियो । हाल दैनिक ३ ४ हजार संक्रमित भइरहेका छन् । इन्डोनेशियामा पनि स्थिति उस्तै छ । जुनको तेस्रो सातामा इन्डोनेशियामा करिब २ हजारभन्दा धेरै व्यक्तिको भाइरस संक्रमणबाट ज्यान गयो । जनवरीपछि यो अहिलेसम्मकै सर्वाधिक संख्या हो । हरेक साता त्यहाँ करिब एक लाखभन्दा धेरै मानिस संक्रमित भइरहेका छन् । 

बेलायत
बेलायतमा डेल्टा भेरिएन्टकै कारण १९ जुलाईसम्म प्रतिबन्धहरु लागू गरिएका छन् । यसअघि सरकारले २१ जुनदेखि पूर्णरुपमा लकडाउन खोल्ने योजना बनाएको थियो । सन् २०२० को डिसेम्बरदेखि खोप अभियानको सुरुवात भएपछि जनवरी यता लगातार संक्रमण घटिरहेको थियो । तर डेल्टा भेरिएन्ट पुष्टि भएसँगै दैनिक नयाँ संक्रमितको संख्या तीव्र बढिरहेको छ । 

इजरायल 
संक्रमण रोक्नका लागि इजरायलका प्रधानमन्त्रीले १२ देखि १८ वर्षसम्मका किशोरकिशोरी र उनीहरुका अभिभावकलाई ९ जुलाईसम्म खोपको पहिलो डोज लगाउन अपिल गरेका छन् । इजरायलले ५६ प्रतिशत जनसंख्यामा कोरोना खोपको दुवै डोज लगाइसकेको दाबी गरेको छ । इजरायलले अप्रिलदेखि सार्वजनिक स्थलमा र जुन १५ देखि कार्यालयहरुमा मास्क लगाउन छुट दिएको थियो । तर हालै संक्रमण १ सयभन्दा माथि पुगेपछि पुनः मास्क अनिवार्य गरेको छ । 

डेल्टा प्लस भेरिएन्टलाई लिएर विश्वभर चिन्ता डेल्टा भेरिएन्ट फैलिएको बेलायतका सहरमा सेना तैनाथ, परीक्षण तीव्र